لا تعليق

البعض منكم ممكن يستصغر بإحساسي بس بجد حصلت حاجه غريبة جدا جدا السحلفة بتاعتي ماتت بس محدش حاسس بيا بس أنا عارفه إنه قضاء ربنا وقدره ومكتوب من ساعة ما جبتها إنها هتموت بس المشكلة إني كنت حسه إنها هتموت مش عشان خاطر كانت عيانه بس كان جايلي إحساس غريب كده من يومين وأنا كأني مستنياها تموت بس النهارده بالفعل زي لما بيقولوا الواحد لما بيضحك كتير يبقي اللهم ما إجعله خير النهارده وأنا في السكشن بتاع المحاسبة أول مرة في حياتي أَضحك كده بس كنت متأكده إنه في حاجه غلط ورجعت لقيت ماما بتقولي السحلفة من الصبح متحركتش دخلت عادي زي لما برخم عليها ساعات وأفضل اخبط عليها بس هيا كانت مطلعة رجلها وايديها بره بلمس ايديها لقيتها زي الخشب سبحان الله زي لما احنا بنموت بتخشب ساعتها بقي جاتلي هيستريا عياط بجد عارفه إن البوست ممكن تقولوا عليه تافه بس عافه برضه إنه إحساسي اللي جالي كان مش طبيعي ،،،،،،،،،،،

رحلة إسكندراني يعني إسكندرية يا محلاها ؟؟

بمناسبة النجاح السعيد بابا وافق إن أنا وأختي نطلع رحلة للإسكندرية مدتها يوم وطبعاً عشان أنا بحبكم وعشان طبعاً هوايتي الأولي التصوير جبتلكم أحلي صور صورتها النهارده وعلي فكرة أنا مقدرتش أنام غير لما تشاركوني أجازتي الممتعة يلا بقي نشوفها وتقولوا رأيكم بصراحه بعرف أصور ولا لأ طبعاً أنا حاولت أرتبهم بس مش قدرت

بس أنا بقي هخليكم تسموهم علي مزاجكم وأنا الاسم اللي هايعجبني هاحطه عليها بجد كان يوم حلو وممتع جداً رغم إنه كان مليان خناقات تحياتي يا حلوين ،،،،

طعم النجاح

إحساس جديد حسيته وطعمه حلو جداً جداً كنت هموت وأحسه اللي حصل إني زي ما إنتوا عارفين مستنية النتيجة علي نار من يوم الثلاثاء وكنت خلاص علي أخري من الموضوع ده وكمان كانت حالتي النفسية زي الزفت المهم هما كانوا بينزلوا النتيجة الساعه 9:30م علي الموقع إنها تنزل علي حظي الإسود وبعيد عنكوا أنا من مرضي الضغط الواطي معرفش إزاي علي وقاعده بقي هموت المهم اتصلوا بيا كل صحابي وهما كمان علي نار وكنت بكلم زيزو صديقي اللدود من حوالي الساعه 9:45م وكل خمس دقايق أدخل أشوفها ظهرت ولا لأ المهم ،،، الخبر العاجل ====>>
إنه في تمام الساعه الـ 10:10م قمت أنا كان زيزو بيقولي عاوز رقم جلوسه عشان زهق من وشي الفقري ودخلت كنت حطيت طبعاً رقمي أول حاجه ودخلته وال ايه النتيجة ظهرت قلبي وقف ومقدرتش أبص علي الأرقام (وده طبعاً في أقل من الثانية) شُفتها وكلاكيت تاني مرة يا مااااااااااااااااااااااااااااااامااااااااااااااااااااااااااااااا أنا نجحت وجبت نتيجة زيزو هو كمان نجح وأغلب صحابنا نجحوا واللي مش نجح معلش يبقي يعوض بس بجديه شوية لأن أنا مجربة طعم الفشل برضه وربنا مع الجميع

الست دي أمي بقي فضلت تحضني وكانت هتموت من الخضه حبيت بقي أفرحكم معايا لأنكم كمان من الناس اللي بحبهم جدا بس عاوزة أقولك إني مش قادره أكتب ،،،،،

دي بقي باقة ورد لصحابي اللي نجحوا وأنا كمان ولكل المدونين وسمعوني أغنية الناجح يرفع إيده بقي

العقل والروح بين العشاق

هو : أنتي عقلي

هي : وأنت روحي

هو : ولماذا روحك؟

هي : عندما يموت الإنسان يتحلل العقل ولكن تظل الروح خالده فأنت روحي

بقلم : مريوم

**************************************

إدعولي كلكم النتيجة بتاعتي هتظهر بعد بكره

رساله حلوة جداً

استلمت رسالة بالإيميل عنوانها كما يلي (دولة عربية) فحواها كما يلي :-

عندما تمتلئ (المقاهي) بالشباب ... وتشكوا المساجد والمكتبات من
الغياب..
ابتسم ...أنت في دولة عربية

*******************
عندما يستضيفون (راقصة) لتتحدث عن (تحرير) فلسطين ...
ابتسم ...أنت في دولة عربية

*******************
عندما تدرس الابتدائي 6 سنوات .. والإعدادي 3 سنوات ومثلها المرحلة الثانوية .. وأربع سنين في الجامعة أو خمسة .. لتعمل بعدها في سوق الخضار ..
ابتسم ...أنت في دولة عربية

*******************
عندما يكون هناك ستة ملايين (عامل) أجنبي .. وثلاثة ملايين (عاطل).

ابتسم ...أنت في دولة عربية

*******************

عندما تقوم من النوم لتجد في هاتفك المحمول رسائل ليس لها أي معنى ...
ابتسم ...أنت في دولة عربية
*******************

عندما تكون هناك (خمسة عشرة) مجلة تهتم بـ (الشعر الشعبي)ولاتكون هناك مجلة واحدة أو (نشرة) تهتم بالأمور العلمية ...
ابتسم ...أنت في دولة عربية

*******************
عندما تذهب إلى تلك المنطقة في بلدك .. فلا تجد منهم من يتحدث العربية وتظن أنك تعديت الحدود حتى وصلت إلى (دكا)...لا تستغرب ... أنت في أسواق إحدى دول الخليج حيث كل البائعين أجانب

ابتسم ...أنت في دولة عربية

*******************

عندما (تضحك)عليك شركة الاتصالات في بلدك و(تشفط) كل اللي في جيوبك ..
ابتسم ...أنت في دولة عربية

*******************

عندما تقود(سيارتك الأمريكية) وتأكل (الهمبورجر) وتشرب(البيبسى) ثم تطالب بمقاطعة المنتجات الأمريكية ...

ابتسم ...أنت في دولة عربية

*******************

أن لا تحصل على الترقية في عملك إلا (بواسطة) ولا تجيب تقدير في الجامعة إلا (بواسطة) ولا تجد الوظيفة إلا (بواسطة) ولا تنتقل إلا

(بواسطة) ولا تحصل على (حقوقك إلا بواسطة ).

ابتسم ...أنت في دولة عربية
*******************
عندما تدخل المنتديات و تتحدث مع (رجل يستعمل الإنترنت باسم (بنت) (ابتسم) ...أنت في دولة عربية
عندما تصل إلى هذا السطر ولا زلت مستمراً في القراءة فاعرف انك فاضي

*******************
و ابتسم ...لأنك عايش في دولة عربية

إحساس بعدم الأمان في بلد إنعدم فيها الأمن والأمان

حاجات كتير عاوزة اتكلم فيها بس مش عارفه ابتدي منين الموضوع ببساطة إني هتلكم عن حاجتين مهمين :-

1. المعاكسات




2. العملات المعدنية

أولا : المعاكسات

كل يوم بخرج ده شئ عادي بس اللي مش عادي ان خلاص مبقاش في أمان لما اجي ماشية وواحده يتكلم بأقذر المعاني هرد عليه هقوله ايه هخاف طبعا كمان فرضا طلع شارب اي حاجه تبقي وقعتي سودا اجي ماشية تاني بتوع العربيات يتكلموا كلام بردوا غبي ده مش ليا لوحدي ده اكيد لناس تانية هقولكوا حاجه فاكرين زمان ايام الزمن الجميل لما كانوا بيلبسوا ميني جيب وماشاء الله كانوا حلوين وقمر مكناش بيحكولنا عن حوادث الاغتصاب ولا الكلام الفارغ ده كان فلان بيخاف علي فلانة ميعرفهاش كانها من بقية عيلته زي ما بنقول الموضوع ده بجد بقي يخليني افكر بطريقة يعني كمان فترة سنة ولا اتنين ولا تلاتة هيعملوا اي ربنا يستر.

ثانياً : العملات المعدنية

ويقصد بها الجنيهات وفئة الخمسون قرش

اركب الميكروباص وانا رايحة الجامعه اديله الفلوس يقولىىىىى :

لالالالالالالالالالالالا الناس مش بترضي تاخدها طيب ياسيدي انا اخدتها ليه علي راسي ريشه ولا علي راسي ريشة ده السواق او السايس لكن لما تبقي الناس بجد حاجه تجيب هلع الفلوس دي عملوها عشان نصرفها مش ده يتأمر وده يتأمر انا اعرف صديق بيحوشهم تقريبا محوش منهم حوالي 50 جنيه هنياله لو انا بعمل زيه كان زماني بقيت مليونيرة

وفي الأخر ربنا يهدي الجميع

وعاوزة اقول للمرة التانية وعشان محدش يزهق انا كل بوست هنزله هقول فيه اني زعلانه من بقلظ رصيف نمرة 5 واقولها اللي علي علي يلا لا تؤاخذونا

ازيكوا عاملين ايه يا كل المدونين؟؟؟ وحشتوني جدا جدا جدا المهم كنت عاوزة اقول ان انا زعلانه من بقلظ رصيف نمرة خمسة جدا جدا عشان خاطر مش عارفه ادخل مدونتها وكمان هيا عارفه اني بحب ادخل المدونة بتاعتها جدا وكمان الفترة اللي فاتت كانت مملة جدا الامتحانات والجامعة والقرف كله واحداث غريبة كلها يعني مش عارفه مش مرتبطة ببعضها خالص خالص وإن شاء الله ارجع تاني أدخل المدونة من أول وجديد،،،،،