الاثنين، 30 مارس 2009

مش عارفه أقول إيه

فرحانه النهارده جداً جداً جداً رغم إني خلاص هثبت إسم المدونة بتاعتي علي كده مبقاش ينفع أرجعها للحياة لنا مش عشان خاطر إني كنت مدمرة نفسياً ولا عشان خاطر أي حاجه خالص عشان خاطر إستاذي المبجل والفضيل بووووودي خدها وده شرف كبير ليا هو زعل طبعاً لما لقاني غيرت اسمها فنزل بوست عنده في المدونة ومضمونه كالتالي :-
شكر واجب
يبدو أن مريووم تخلت عن اسم مدونتها، ولكي تبقى المدونة مستمرة بالاسم فقط وليس بالمضمون أستأذن مريووم بجعل اسم مدونتها السابقة عنوانا لمدونتي بـ الحياة بعد أن تخليت عنه ، لأن الحياة لا تتوقف عند حالة معينه ، بل هي متدفقة كالنهر والشلال ، وفي كل يوم تنبت عشبة أو نبتة أو وردة جديده أو تولد حياة في جسد جاء للحياةالحياة مادتها نحن ... نحن كلنالك تحياتي مريووم
طبعاً أنا اللي بشكرك علي إن حضرتك خلتها تستمر أكيد بعنوانها والمضمون واثقه إنه هيعجبكم أكتر من مدونتي

السبت، 28 مارس 2009

لا تعليق


البعض منكم ممكن يستصغر بإحساسي بس بجد حصلت حاجه غريبة جدا جدا السحلفة بتاعتي ماتت بس محدش حاسس بيا بس أنا عارفه إنه قضاء ربنا وقدره ومكتوب من ساعة ما جبتها إنها هتموت بس المشكلة إني كنت حسه إنها هتموت مش عشان خاطر كانت عيانه بس كان جايلي إحساس غريب كده من يومين وأنا كأني مستنياها تموت بس النهارده بالفعل زي لما بيقولوا الواحد لما بيضحك كتير يبقي اللهم ما إجعله خير النهارده وأنا في السكشن بتاع المحاسبة أول مرة في حياتي أَضحك كده بس كنت متأكده إنه في حاجه غلط ورجعت لقيت ماما بتقولي السحلفة من الصبح متحركتش دخلت عادي زي لما برخم عليها ساعات وأفضل اخبط عليها بس هيا كانت مطلعة رجلها وايديها بره بلمس ايديها لقيتها زي الخشب سبحان الله زي لما احنا بنموت بتخشب ساعتها بقي جاتلي هيستريا عياط بجد عارفه إن البوست ممكن تقولوا عليه تافه بس عافه برضه إنه إحساسي اللي جالي كان مش طبيعي ،،،،،،،،،،،

الأحد، 8 مارس 2009

رحلة إسكندراني يعني إسكندرية يا محلاها ؟؟

بمناسبة النجاح السعيد بابا وافق إن أنا وأختي نطلع رحلة للإسكندرية مدتها يوم وطبعاً عشان أنا بحبكم وعشان طبعاً هوايتي الأولي التصوير جبتلكم أحلي صور صورتها النهارده وعلي فكرة أنا مقدرتش أنام غير لما تشاركوني أجازتي الممتعة يلا بقي نشوفها وتقولوا رأيكم بصراحه بعرف أصور ولا لأ طبعاً أنا حاولت أرتبهم بس مش قدرت




بس أنا بقي هخليكم تسموهم علي مزاجكم وأنا الاسم اللي هايعجبني هاحطه عليها بجد كان يوم حلو وممتع جداً رغم إنه كان مليان خناقات تحياتي يا حلوين ،،،،

الجمعة، 6 مارس 2009

طعم النجاح


إحساس جديد حسيته وطعمه حلو جداً جداً كنت هموت وأحسه اللي حصل إني زي ما إنتوا عارفين مستنية النتيجة علي نار من يوم الثلاثاء وكنت خلاص علي أخري من الموضوع ده وكمان كانت حالتي النفسية زي الزفت المهم هما كانوا بينزلوا النتيجة الساعه 9:30م علي الموقع إنها تنزل علي حظي الإسود وبعيد عنكوا أنا من مرضي الضغط الواطي معرفش إزاي علي وقاعده بقي هموت المهم اتصلوا بيا كل صحابي وهما كمان علي نار وكنت بكلم زيزو صديقي اللدود من حوالي الساعه 9:45م وكل خمس دقايق أدخل أشوفها ظهرت ولا لأ المهم ،،، الخبر العاجل ====>>
إنه في تمام الساعه الـ 10:10م قمت أنا كان زيزو بيقولي عاوز رقم جلوسه عشان زهق من وشي الفقري ودخلت كنت حطيت طبعاً رقمي أول حاجه ودخلته وال ايه النتيجة ظهرت قلبي وقف ومقدرتش أبص علي الأرقام (وده طبعاً في أقل من الثانية) شُفتها وكلاكيت تاني مرة يا
مااااااااااااااااااااااااااااااامااااااااااااااااااااااااااااااا أنا نجحت وجبت نتيجة زيزو هو كمان نجح وأغلب صحابنا نجحوا واللي مش نجح معلش يبقي يعوض بس بجديه شوية لأن أنا مجربة طعم الفشل برضه وربنا مع الجميع
الست دي أمي بقي فضلت تحضني وكانت هتموت من الخضه حبيت بقي أفرحكم معايا لأنكم كمان من الناس اللي بحبهم جدا بس عاوزة أقولك إني مش قادره أكتب ،،،،،

دي بقي باقة ورد لصحابي اللي نجحوا وأنا كمان ولكل المدونين وسمعوني أغنية الناجح يرفع إيده بقي






الثلاثاء، 3 مارس 2009

العقل والروح بين العشاق



هو : أنتي عقلي


هي : وأنت روحي


هو : ولماذا روحك؟


هي : عندما يموت الإنسان يتحلل العقل ولكن تظل الروح خالده فأنت روحي


بقلم : مريوم
**************************************
إدعولي كلكم النتيجة بتاعتي هتظهر بعد بكره