توابع الامتحانات

قعدت أقول إمتي هخلص زفت الطين الهباب وأخرج وأروح السينما ومسكت بابا زعقتله قولتله اسمع بقي أنا كبرت ولازم أخرج بعد الامتحانات مع صحابي شوفوا بقي دي بداية اليوم الجامد بتاع أخر يوم في الامتحانات طبعاً منمتش وبابا يقولي إرجعي 5 وانا اقول 6 وهو 5 وانا 6 من الاخر انتوا عارفين كلام مين مشي (بلا فخر انا طبعاً بس بمبررات إنه الفيلم بيخلص 5) ونزلت من البيت الساعه 6:55ص وأقول لماما تعالي وصليني عشان خاطر الكلاب اللي في الشارع وهيا تقولي مفيش كلاب ياماما اسمعي الكلام ماعلينا نزلت وحدي وانا مرعوبة حكم أي حد عاوز يرعبني يجبلي كلب هدية ،،،،،،،،،،،،

وبعدين بقي متفهموش الكلاب شمت الخبر ولقيت بتاع 10 كلاب بيتخانقوا مع بعض ماهو بقي حبك لما انا نزلت وقامت الانسه العظيمه المبجلة برفع الجيبة وهاتك يافكيك وهما يجروا وانا اجري لحد ما لقيت توك توك قمت نطه فيه الراجل يقولي ياست اهدي قعدت اقوله ست في عينك خرجني من المنطقة دي وبعدين اتكلم براحتك (اتكلم من القلب) روحت بقي الجامعه ومرعوبة دي محاسبة يا جماعه يعني اكتر حاجه بكرهها في الدنيا وقعدت مع صديقاتي المرعوبات هن الاخريات وبعدين استعنا علي الشقي بالله تخيلوا الصدمه الكبري دخلت الإمتحان ملقتش الموازنة العامة اه والله زي ما بتكلم ملقتش الموازنة الدكتور جايب اسئلة اختيارات يعني (حادي بادي كرنب زبادي...) الحمد لله حلتهم وخلصتهم وبعدين دخلت علي الدكتور التاني جاب قايمة الدخل ولا اعرف شكلها من اللي كنت مذاكراها خالص قوم ايه رصتها زي ما انا حفظاها وحليت النظري وخلصت المهم كله خرج بدري بقي مفيش موازنة وانا لزقت لحد اخر الوقت يلا ممكن اجيب درجه ولا اتنين خلصت وكان عندي مشوار لوسط البلد (معرفش فيها حاجه مش عايشه في مصر) خلصت ورجعت علي الجامعه تاني ياجماعه لقيت صحابي ولا كأنهم ضاربين بعض يلا نخرج مخرجناش روحنا بقي قعدنا في هارديز وخلصنا والمجانين رجعوا تاني علي الجامعه مش فاهمه ازاي قولت لأ اروح انا بقي مبدهاش روح ودي كانت اخر تابع ،،،،،،،،،،،

روحت مقتولة لقيت ماما بتقولي هنروح لجدو تيجي معانا عاوزة اصرخ واقول محدش حاسس بيا ولا ايه ( انا خلصت امتحانات يا ناس يعني نوم لمده 10000000 ساعات تانين )فنمت صحيت بقي لقيت صدمه قبل ما انام حطيت الخط بتاع موبينيل وشلت اتصالات في العدة ولما صحيت ملقتش الخط وقلبت عليه الدنيا وانا حطاه في العدة وفي الاخر لم اتوصل لحل جديده وضاع الخط يا ولدي واتصلت بماما البيت فيه عفريت ضيع الخط واستعوضت ربنا ،،،،،،،،

ودي كانت أخر توابع للإمتحانات اللي عملتلهم في البيت قلق وهرج ومرج وقلة نوم وعملتلي انا شخصيا حاله نفسية ما يعلم بيها إلا ربنا وبقيت مجنونة،،،،،،،،،،،،،،،،،،،،،،،،،،،،،،،،،،،،،،،،،،

معلش طولت بقي بس دي حاجه مش هتتنسي خالص

نسيت أقول إني هغير إسم المدونة لمريوم تاني لحسن الإسم ده جابلي إكتئاب بس الموقع زي ما هو ممكن يكون عندي إنفصام بس مش مشكلة سبحان مغير الأحوال